Ali Radanın komitə sədri: Ukrayna heç bir ərazi güzəştinə getməyəcək

Bütün cəbhələrdə vəziyyət kifayət qədər gərgindir.

Bunu "Report"un Şərqi Avropa bürosuna açıqlamasında, Ukrayna Ali Radasının Müdafiə və təhlükəsizlik komitəsinin sədri Fedor Venislavski bildirib.

Onun sözlərinə görə, Rusiya mümkün danışıqlar ərəfəsində bəzi yaşayış məntəqələrini ya qismən, ya da tamamilə nəzarət altına almağa çalışır:

"Lakin müdafiə qüvvələrimiz onların qarşısını uğurla alır. Üstəlik, hətta bir neçə həftə əvvəl Donetsk istiqamətində vəziyyəti də nəzarətə götürülüb. Demək olar ki, hər gün silahlı qüvvələrimiz rusların zəbt etdiyi bəzi yaşayış məntəqələrini azad edir. Ona görə də Ukraynanın heç bir ərazi güzəşti ola bilməz. Prinsipcə silahlı qüvvələrimizin Ukraynanın hansısa ərazisindən çıxarılması ilə bağlı qərarlar mümkün deyil. Bunlar qəbuledilməz şərtlərdir ki, prezident tərəfindən də dəfələrlə səsləndirilib. Müxtəlif səviyyələrdə Ukrayna dövlətinin digər nümayəndələri də bunu səsləndiriblər".

Komitə sədri onu da bildirib ki, xarici silahlı qüvvələrin Ukrayna ərazisinə daxil olması üçün konstitusiyaya hər hansı dəyişiklik etməyə ehtiyac yoxdur: "Bizdə xarici silahlı qüvvələrin Ukrayna ərazisinə buraxılması proseduru haqqında qanun var. Bizim parlamentin və prezidentin səlahiyyətləri var ki, onlar öz konstitusion səlahiyyətləri çərçivəsində xarici silahlı qüvvələrin Ukrayna ərazisinə daxil olmasına qərar verə bilərlər".