Qazaxıstanın yeni XİN başçısı Rusiyaya səfər edəcək

Qazaxıstanın yeni xaici işlər naziri Yermek Koşerbayev gələn həftə Rusiyaya səfər edəcək.

"Report" xəbər verir ki, bu barədə Rusiya XİN-in rəsmi nümayəndəsi Mariya Zaxarova bildirib.

Səfər zamanı Koşerbayev oktyabrın 22-də Rusiyanın xarici işlər naziri Sergey Lavrovla danışıqlar aparacaq.

"Tərəflər siyasi, ticarət-iqtisadi, mədəni-humanitar sahələrdə ikitərəfli əməkdaşlıq məsələlərini, eləcə də Qazaxıstan Prezidenti Kasım-Jomart Tokayevin Rusiyaya gözlənilən dövlət səfərinə hazırlığı müzakirə edəcəklər", - deyə Zaxarova qeyd edib.

Onun sözlərinə görə, nazirlər regional və qlobal gündəliyə dair məsələlərlə bağlı mövqeləri dəqiqləşdirəcəklər.

Qeyd edək ki, Y.Koşerbayev 2025-ci ilin sentyabr ayının sonunda Qazaxıstanın xarici işlər naziri təyin edilib.