Uqanda Azərbaycanla faydalı qazıntılarla bağlı əməkdaşlıq sazişi imzalamaq istəyir - EKSKLÜZİV

Uqanda Azərbaycanla faydalı qazıntıların kəşfiyyatı və hasilatı, infrastrukturun inkişafı sahəsində əməkdaşlıq haqqında saziş bağlamağa ümid edir.

Bu barədə "Report"a Uqandanın xarici işlər üzrə dövlət naziri Con Mulimba bildirib.

O, Azərbaycana səfəri zamanı Uqandadan olan nümayəndə heyətinin Energetika Nazirliyində görüş keçirdiyini və bu görüşdə iki ölkə arasında neft-qaz, dağ-mədən və hidroenergetika sahəsində əməkdaşlıq perspektivlərinin müzakirə olunduğunu xatırladıb.

"Nazirlikdə Azərbaycan və Uqanda hökumətləri arasında bir sıra əməkdaşlıq istiqamətlərini müzakirə etdik. Uqanda zəngin su ehtiyatlarına malikdir və Nil çayı boyunca hidroelektrik stansiyaların tikilməsi üçün əlverişli olan bir neçə şəlalə yerləşir. Onların bir hissəsi artıq uğurla həyata keçirilib", - dövlət naziri bildirib.

C.Mulimba vurğulayıb ki, Uqanda digər hidroelektrik stansiyaların tikilməsi üçün Azərbaycanın təcrübəsindən yararlanmaq istəyir.

"Bundan əlavə, (Energetika Nazirliyində - red.) faydalı qazıntıların kəşfiyyatı barədə danışdıq. Uqanda faydalı qazıntı ehtiyatları ilə zəngindir. Bizdə çox sayda qızıl, litium, nadir torpaq metalları, kobalt, həmçinin dəmir filizi var. Buna görə də faydalı qazıntıların kəşfiyyatı və hasilatı, infrastrukturun tikintisi sahəsində əməkdaşlıq və birgə fəaliyyət haqqında sazişin imzalanmasını səbirsizliklə gözləyirik", - o əlavə edib.