İsrailin hücumu nəticəsində Husi hökumətinin üzvləri ölüb - YENİLƏNİB

Yəməndə "Ənsar Allah" hərəkatının husi üsyançıları tərəfindən yaradılmış hökumətin azı 10 üzvü İsrailin Sənaya endirdiyi zərbə nəticəsində öldürülüb.

"Report" TASS-a istinadən xəbər verir ki, bu barədə Yəmən hərəkatındakı mənbə bildirib.

Məlumata görə, İsrail əməliyyatının qurbanları baş nazirin müavini Cəlal ər-Ruveyşan, xarici işlər naziri Camal Amer, informasiya naziri Haşim Şərafəddin, yerli hökumət naziri Məhəmməd əl-Mədəni, iqtisadiyyat naziri Muin əl-Mahakri, ədliyyə naziri Mücahid Əhməd, nəqliyyat naziri Məhəmməd Kahim, Əmək naziri Samir Bajala, təhsil naziri Həsən əl-Səadi və idman naziri Məhəmməd əl-Mövlid olublar. 

Bundan əvvəl "Ənsar Allah" hərəkatı husilərin formalaşdırdığı hökumətin başçısı Əhməd Qalib əl-Rahavinin, eləcə də adları açıqlanmayan bir neçə nazirin ölümünü rəsmən təsdiqləyib. Ölən hökumət başçısının yerinə onun birinci müavini Məhəmməd Miftah keçib.

18:33

Yəmənin üsyançı "Ənsar Allah" hərəkatından olan husilər, baş nazir Əhməd Qalib ər-Rahavinin İsrail ordusunun zərbəsi nəticəsində öldürüldüyünü təsdiqləyib.

Bu barədə "Report" xarici KİV-ə istinadən xəbər verir.

Hərəkat üsyançı baş nazirlə birlikdə onun bir neçə nazir yoldaşının da öldürüldüyünü qeyd edib, lakin onların adları açıqlanmayıb.

Avqustun 29-da İsrail Müdafiə Ordusu Yəməndə husilərin baş qərargah rəisi və müdafiə nazirinin yerləşdiyi hərbi obyektə zərbə endirdiyini təsdiqləyib.