Latviya səfiri: "LEF Azerbaijan" layihəsi Mərkəzi Baltik ölkələri ilə əlaqələrinizi gücləndirib"

"LEF Azerbaijan" layihəsi Mərkəzi Baltik ölkələri ilə Azərbaycan arasında əməkdaşlığı gücləndirmək üçün bir platforma yaradıb.

"Report"un məlumatına görə, bunu Latviyanın Azərbaycandakı səfiri Edqars Skuya Bakıda keçirilən "Mərkəzi Baltik – Azərbaycan" biznes forumunda bildirib.

Diplomatın sözlərinə görə, layihə dörd ölkədən - Azərbaycan, Estoniya, Latviya və Finlandiyadan olan iştirakçılara təkcə yeni əlaqələr qurmağa deyil, həm də dəyərli təcrübə mübadiləsi aparmağa imkan verib.

"Dörd ölkədən olan nümayəndə heyətləri əla iş görüblər: əlaqələr qurublar, təcrübə və ideyaların mübadiləsini ediblər. Bu layihə sayəsində bir-birimiz, ölkələrimiz, bazar imkanları və ticarət perspektivləri haqqında çox şey öyrəndik. Azərbaycanla tanış olduq və gələcək qarşılıqlı fəaliyyət üçün potensial gördük", - E.Skuya qeyd edib.

Səfir vurğulayıb ki, "LEF Azerbaijan" çərçivəsində əməkdaşlıq gələcək təşəbbüslər və uzunmüddətli tərəfdaşlıqlar üçün təməl qoyub: "Bu layihəni gələcək tədbirlər üçün başlanğıc nöqtəsi kimi istifadə edin. Siz artıq inkişaf etdirə, gələcəkdə istifadə edə biləcəyiniz əlaqələr qurmusunuz. Bu tərəfdaşlığın məntiqi nəticəsi əməkdaşlıq haqqında memorandumun imzalanması olacaq".