BP-nin vitse-prezidenti: "XXI əsrin əmək bazarı bəziləri üçün təhlükə, bəziləri üçün isə yeni imkanlardır"

Əmək bazarı sürətlə dəyişir və işin mahiyyəti də dəyişir - bu prosesləri artıq dayandırmaq mümkün deyil.

"Report" xəbər verir ki, bunu BP-nin Xəzər regionu üzrə vitse-prezidenti Bəxtiyar Aslanbəyli Bakıda keçirilən "Gələcək karyeralar: necə aktual, hazır və tələb olunan qalmaq olar" mövzusunda panel müzakirəsində çıxışı zamanı bildirib.

Onun sözlərinə görə, dəyişikliklər həmişə cəmiyyəti müşayiət edib, lakin bu gün onların tempi misli görünməmiş olub.

"İndi dəyişikliklər keçmiş dövrlərlə müqayisədə daha sürətlə baş verir. Bundan əlavə, bir nəslin həyatı ərzində biz oyun qaydalarını dəyişən iki-üç böyük transformasiyanın şahidi ola bilərik. Bu, şübhəsiz ki, əmək bazarına təsir edir. Bu təhlükədirmi? Kimsə diplomatik şəkildə deyəcək: yox. Mən isə birbaşa deyəcəm: bəli, bu təhlükədir", - BP-nin vitse-prezidenti bildirib.

Eyni zamanda, B.Aslanbəyli baş verən proseslərin yeni perspektivlər açdığını vurğulayıb: "Hər şey dəyişiklikləri necə qəbul etməyinizdən asılıdır - təhlükə kimi, yoxsa imkan kimi. Əgər onlara şans kimi baxsanız, əhəmiyyətli fayda əldə edə bilərsiniz. Müsbət tərəfi odur ki, transformasiya olunan əmək bazarı həmişə ilhamlandıra biləcək yeni bir şey təklif edir".

O, xüsusi diqqəti növbəti 30-40 il əmək bazarında olacaq gənclərə yönəldib. B. Aslanbəyli, gələcəyin əsas bacarığı kimi adaptasiya qabiliyyətini qeyd edib.

"Nə qədər dəyişikliklərə çevik olsanız, yeni bacarıqları və öyrənmə vərdişlərini nə qədər asanlıqla mənimsəsəniz, bir o qədər uğurlu olacaqsınız. Bu gün dünyanın hər yerində universitetlər tələbələrə təkcə konkret biliklər deyil, həm də öyrənmək bacarığı verməyə çalışırlar. Uğurlu insan öz biliyini artırma və yeni sahələri mənimsəmə vərdişi formalaşdıran şəxsdir. Lakin təhsil həmişə şəxsi intizamla müşayiət olunmalıdır", - BP-nin vitse-prezidenti vurğulayıb.

Qeyd edək ki, bu tədbir BCC Akademiyasının proqramı çərçivəsində təşkil olunub. Tədbirdə gənclərin inkişafı, məşğulluq potensialı və gələcək karyera imkanları müzakirə edilib. Bu il "Formula-1"in Azərbaycan Qran Prisində rekord sayda müraciət qeydə alınıb. Cəmi 48 saat ərzində 31 000-dən çox müraciət daxil olub. Bu il 2 000-ə yaxın könüllü yarışda iştirak edəcək. BCC Akademiyası da könüllülərin inkişafına dəstək məqsədilə mütəmadi olaraq müxtəlif təlimlər və panellər təşkil edir. Bu tədbirlərin əsas məqsədi gəncləri gələcək karyeralarına hazırlamaq, onların peşəkar bacarıqlarını artırmaq və əmək bazarında daha rəqabətədavamlı olmalarına şərait yaratmaqdır.