"Neftçi"nin legioneri xüsusi təyyarə ilə Qvineyanı tərk edir

Yunanıstanın "Olimpiakos", İngiltərənin "Liverpul" və Fransanın "Tuluza" klubları Qvineyadakı çevrilişdən sonra futbolçularını Avropaya qaytarmaq üçün birlikdə çalışır.

"Report" "Airnews.gr" saytına istinadən xəbər verir ki, "Olimpiakos" və "Liverpul" oyunçuların sağ-salamat ölkədən çıxması üçün xüsusi təyyarə kirayələyib.

Qeyd edək ki, müqavilə ilə Afina klubuna məxsus olan və icarə əsasında "Neftçi"də oynayan Mamadu Kane də hərbi çevrilişə görə Qvineyanı tərk edə bilməyib. 24 yaşlı yarımmüdafiəçi Mərakeş yığması ilə DÇ-2022-nin seçmə oyununa görə Afrikaya yollanıb. Sentyabrın 6-da keçirilməli olan Qvineya - Mərakeş görüşü FIFA-nın qərarı ilə təxirə salınıb. Bir həftə ərzində ölkəyə bütün giriş-çıxışlar dayandırılıb.