Pakistanda terror hücumları nəticəsində 80-dən çox insan həlak olub - YENİLƏNİB

"Bəlucistan Azadlıq Ordusu" separatçı qrupu şənbə günü Pakistanın Bəlucistan vilayətində əlaqələndirilmiş hücumlar seriyasına görə məsuliyyəti öz üzərinə götürüb, bu hücumlar nəticəsində 80-dən çox insan həlak olub.

"Report" xəbər verir ki, bu barədə "Associated Press" yerli hakimiyyətə istinadən məlumat yayıb.

Məlumata görə, 11 mülki şəxs, təhlükəsizlik xidmətinin 10 əməkdaşı və 67 hücum edən şəxs həlak olub. Qruplaşmanın üzvləri bir neçə bankı da qarət ediblər.

Vilayət hökumətinin nümayəndəsi Şahid Rind bildirib ki, hücumların əksəriyyətinin qarşısı alınıb.

Bəlucistanın səhiyyə naziri Baxt Məhəmməd Kakar bildirib ki, şənbə günü hücumlar demək olar ki, eyni vaxtda başlayıb. Qruplaşmanın üzvlərinin hədəfi Dolbandin şəhərində keşik məntəqələri, polis nəqliyyatı, idarəetmə olub. Onlar, həmçinin magistral yollarda avtobus sərnişinlərini girov götürməyə cəhd ediblər.

Mastunq rayonunda terrorçular həbsxanaya hücum edib və 30 məhbus azad olunub. Onlar Nuşki rayonunda xalq qoşununun qərargahını ələ keçirməyə cəhd ediblər, lakin hücum dəf edilib.

Hakimiyyətin məlumatına görə, ümumilikdə iki gün ərzində 108 döyüşçü məhv olunub, o cümlədən 41 nəfər əvvəlki gün əyalətdəki iki sığınacağa reydlər zamanı zərərsizləşdirilib.

"Bəlucistan Azadlıq Ordusu"nun əsas məqsədi Əfqanıstan, İran və Pakistana məxsus olan Bəlucistan regionunun suverenliyinə və müstəqilliyinə nail olmaqdır.

14:14

Pakistan təhlükəsizlik qüvvələri son iki gün ərzində Bəlucistan əyalətində 70-dən çox terrorçunu öldürüblər.

"Report" xəbər verir ki, bu barədə Bəlucistanın hökumət başçısının siyasi və media məsələləri üzrə köməkçisi Şahid Rind bildirib.

Onun sözlərinə görə, silahlılar Bəlucistanın bəzi bölgələrində hücumlar həyata keçirməyə cəhd göstəriblər, lakin qarşısı alınıb.

Pakistan "Dawn" nəşrinin məlumatına görə, Hindistanla əlaqəli "Fitna əl-Hindustan" qruplaşması Bəlucistan ərazisində 12 yerdə hücumlar həyata keçirib. Bu hücumlar nəticəsində Pakistanın güc strukturlarının 10 əməkdaşı ölüb.

"Dawn" güc strukturlarındakı mənbəyə istinadən bildirib ki, son 48 saat ərzində Bəlucistanda 88 terrorçu öldürülüb.