Randrianirina iki illik keçid dövrü üçün Madaqaskarın prezidenti vəzifəsini yerinə yetirə bilər - YENİLƏNİB-4

Madaqaskarın Ali Məhkəməsi ordunun polkovniki Maykl Randrianirinanı hakimiyyətin ələ keçirilməsindən sonra prezident vəzifəsini icra etməyə çağırıb.

"Report" xəbər verir ki, bu barədə "Reuters" agentliyi məlumat yayıb.

"Çərşənbə axşamı Madaqaskar Ali Məhkəməsi Z nəslinin etirazçılarına dəstək üçün üsyan təşkil etdikdən sonra hakimiyyəti ələ keçirən ordunun komandiri, polkovnik Maykl Randrianirinanı prezidentliyə postunu tutmağa dəvət edib", - məlumatda deyilir.

Ali Məhkəmə həmçinin Randrianirinanı 60 gün ərzində yeni seçkilər təşkil etməyə çağırıb.

Hərbçilərin rəhbəri olan polkovnik Randrianirina əhali qarşısında çıxışında yeni seçkilərin keçirilməsinə qədər iki il davam edəcək keçid dövrünün başladığını elan edib.

19:57

Madaqaskarda hakimiyyəti ələ keçirən hərbi qrup konstitusiyanın fəaliyyətini dayandırdığını və keçid hakimiyyət orqanlarının formalaşdırıldığını elan edib.

"Report" xəbər verir ki, bu barədə "Orange" portalı məlumat yayıb.

Portalın məlumatına görə, Quru Qoşunlarının Personal İdarəetmə Korpusunun (CAPSAT) nümayəndəsi polkovnik Maykl Randrianarinanın başçılıq etdiyi hərbçilər paytaxt Antananarivu şəhərinin mərkəzindəki prezidentin keçmiş iqamətgahı olan Ambuhitsuruhitra sarayını ələ keçiriblər.

Milli radioda çıxış edən Randrianarina ölkənin 2010-cu il dekabrın 11-dən qüvvədə olan konstitusiyasının fəaliyyətinin dayandırıldığını və keçid hakimiyyətinin yaradıldığını elan edib.

Polkovnik bildirib ki, bu addımlar xalqın demokratiyanın bərpası tələblərinə cavab olaraq həyata keçirilir.

Tezliklə konstitusiya referendumu və yeni ümumi seçkilər elan ediləcək.

18:09

Madaqaskarda Prezident Andri Radzuelinanın barəsində impicment elan olunduqdan sonra hərbçilər hakimiyyəti öz əllərinə aldıqlarını bəyan ediblər.

"Report" xəbər verir ki, bu barədə xarici KİV-lər məlumat yayıb.

Onlar bütün əvvəlki dövlət orqanlarını buraxıblar.

"Biz hakimiyyəti öz əlimizə aldıq", - polkovnik Maykl Randrianirina milli radionun efirində bildirib.

O qeyd edib ki, hərbçilər prezidentin impicmentinə səs verən parlamentin aşağı palatası istisna olmaqla, bütün institutları buraxırlar.

17:30

Madaqaskar Milli Assambleyası (parlamentin aşağı palatası) prezident Andri Radzuelinanın hakimiyyətdən uzaqlaşdırılmasının lehinə səs verib.

"Report" xəbər verir ki, bu barədə xarici KİV-lər məlumat yayıb.

131 deputatdan 130-u prezidentin istefasının lehinə səs verib.

15:00

Madaqaskar Prezidenti Andri Radzuelina Milli Yığıncağınının (parlamentin aşağı palatası) buraxıldığını bildirib.

"Report" xəbər verir ki, bu barədə dövlət başçısının fərmanında qeyd olunub.

"Konstitusiyanın 60-cı maddəsinə uyğun olaraq, Milli Yığıncaq buraxılır", - fərmanda bildirilib.

Prezident baş naziri məlumatlandırdıqdan və Senatın və Milli Yığıncağın sədrləri ilə məsləhətləşdikdən sonra aşağı palatanı buraxmaq hüququna malikdir.

2025-ci ilin sentyabr ayının sonunda Madaqaskarda su və elektrik kəsintiləri səbəbindən başlayan və tezliklə hökumət əleyhinə aksiyalara çevrilən kütləvi etirazlar baş verib.

Artan böhran fonunda Prezident Andri Radzuelina bazar günü Fransaya məxsus hərbi təyyarə ilə ölkəni tərk edib. Müxalifət prezidentin istefasını və keçid hökumətinin formalaşdırılmasını tələb edir.