Yusif Abdullayev: "Gənclər emosional intellektin inkişafında əvvəlki nəsillərdən öndədir"

Emosional intellekt müasir peşələrdə uğurun əsas amillərindən birinə çevrilir.

"Report" xəbər verir ki, bunu Azərbaycanın İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev Bakıda keçirilən "Gələcək karyeralar: necə aktual, hazır və tələb olunan qalmaq olar" mövzusunda panel müzakirəsində çıxışı zamanı bildirib.

Onun sözlərinə görə, emosiyaları idarə etmək bacarığı təkcə peşəkar fəaliyyətdə deyil, həm də gündəlik və ailə həyatında da vacibdir. Məhz bu bacarıq həqiqətən də böyük nəticələr əldə etməyə kömək edir.

"Agentliyimiz həm beynəlxalq, həm də daxili təşviqatla məşğul olur. Bu işdə emosional intellekt mühüm rol oynayır. Bugünkü gənclər əvvəlki nəsilləri xeyli qabaqlayır: əvvəllər sadəcə mövcud olmayan texnologiyalar və imkanlar bu gün gənclər üçün əlçatandır. Bu, gənclərin belə bacarıqları inkişaf etdirməsi üçün böyük imkandır", - Y.Abdullayev vurğulayıb.

O, həmçinin "soft skills" adlanan bacarıqların vacibliyinə diqqət çəkib: "İnsan mükəmməl təhsil alsa və bir neçə dilə yiyələnsə belə, bu, kifayət etməyə bilər. Ünsiyyət qurmağı və danışıqlar aparmağı bacarmaq lazımdır – bu, son dərəcə vacibdir. Biz daim müxtəlif xalqların nümayəndələri ilə görüşür, çox səyahət edirik və belə olan halda məhz emosiyaları nəzarətdə saxlamaq bacarığı uğurun təməlinə çevrilir. Öz təcrübəmə əsaslanaraq deyə bilərəm ki, emosiyalar hər şeyi həll edir. Əgər siz öz emosiyalarınızı idarə edə bilirsinizsə, qalan hər şeyi də idarə edə bilərsiniz".

Qeyd edək ki, bu tədbir BCC Akademiyasının proqramı çərçivəsində təşkil olunub. Tədbirdə gənclərin inkişafı, məşğulluq potensialı və gələcək karyera imkanları müzakirə edilib. Bu il "Formula-1"in Azərbaycan Qran Prisində rekord sayda müraciət qeydə alınıb. Cəmi 48 saat ərzində 31 000-dən çox müraciət daxil olub. Bu il 2 000-ə yaxın könüllü yarışda iştirak edəcək. BCC Akademiyası da könüllülərin inkişafına dəstək məqsədilə mütəmadi olaraq müxtəlif təlimlər və panellər təşkil edir. Bu tədbirlərin əsas məqsədi gəncləri gələcək karyeralarına hazırlamaq, onların peşəkar bacarıqlarını artırmaq və əmək bazarında daha rəqabətədavamlı olmalarına şərait yaratmaqdır.