Azərbaycan ÜTT-yə üzvlüklə bağlı Aİ və Yaponiyaya yeni təkliflər təqdim edib

Azərbaycanın Ümumdünya Ticarət Təşkilatına (ÜTT) üzv olmaq üçün 2021-ci il ərzində gördüyü işlər açıqlanıb.

“Report” xəbər verir ki, bu barədə Nazirlər Kabinetinin 2021-ci ildə fəaliyyəti haqqında hesabatında bildirilir.

Qeyd edilib ki, 2021-ci ildə ikitərəfli danışıqlar çərçivəsində Avropa İttifaqı və Yaponiya ilə mallar və xidmətlər üzrə aparılan danışıqlara dair sorğulara baxılıb və yeni təkliflər hazırlanaraq qarşı tərəfə təqdim edilib.

Vurğulanır ki, Azərbaycanda kənd təsərrüfatında daxili dəstək cədvəllərinin növbəti dövr ( 2018-2020) üzrə hazırlanmış işi əlaqələndirilmiş, ÜTT katibliyindən cədvəllə bağlı daxil olmuş şərhlər və suallar aidiyyatı qurumların məlumatları əsasında cavablandırılaraq aidiyyatı üzrə təqdim edilib.

2020-ci il 24 sentyabr tarixindən fəaliyyətə başlamış və Avropa İttifaqı tərəfindən maliyyələşdirilən “ÜTT-yə üzvlük danışıqları və ticarətlə əlaqəli digər tədbirlərlə bağlı Azərbaycan hökumətinin potensialının gücləndirilməsi” layihəsi üzrə müvafiq işlərin icrası 2021-ci ildə də davam etdirilib.

Layihə çərçivəsində “Məcburi qərarlar və səlahiyyətli iqtisadi operatorlar” “GATS sorğu mərkəzi” , “ƏDV güzəştlərinin ləğvi sahəsində Qazaxıstan təcrübəsi”, “Ticarətdə mühafizə vasitələri üzrə internet saytın yaradılması”, “Əqli mülkiyyət hüquqlarının qüvvəyə minməsi” və bir sira mövzularda dəyirmi masalar təşkil edilib.

Qeyd edək ki, hazırda Azərbaycan ÜTT-nin 20 yaxın üzv ölkəsilə danışıqlar aparır. İndiyədək Türkiyə, Oman, Birləşmiş Ərəb Əmirlikləri, Gürcüstan, Qırğız Respublikası ilə danışıqlar başa çatdırılmaqla müvafiq protokollar imzalanıb.

ÜTT-yə hazırda 160 dövlət üzvdür. Azərbaycan 1997-ci ildən ÜTT-də müşahidəçi statusuna malikdir. 1997-ci il iyulun 16-da ÜTT Katibliyi yanında Azərbaycan üzrə işçi qrupu yaradılıb.