Gələn həftə Azərbaycan-Qazaxıstan Hökumətlərarası Komissiyasının iclası keçiriləcək

Oktyabrın 13-14-də Azərbaycan və Qazaxıstan arasında iqtisadi əməkdaşlıq üzrə Hökumətlərarası Komissiyasının növbəti iclası keçiriləcək.

"Report"un Qazaxıstan bürosunun mənbəyə istinadən verdiyi məlumata görə, iclas Bakıda keçiriləcək.

Qeyd edək ki, Hökumətlərarası Komissiyasının 20-ci iclası 2024-cü ilin mart ayında Astanada keçirilib.

Komissiyanın həmsədri Azərbaycan tərəfindən energetika naziri, Qazaxıstan tərəfindən isə nəqliyyat naziridir.

İki ölkə arasında ticarət dövriyyəsi 2025-ci ilin altı ayı ərzində 301,8 milyon dollar təşkil edib. Bu da ötən ilin eyni dövrü ilə müqayisədə 7,5 % çoxdur.

Qazaxıstandan Azərbaycana əsas ixrac malları - buğda (101,6 milyon dollar), neft (66,2 milyon dollar), neft məhsullarıdır (8,7 milyon dollar).

Azərbaycandan Qazaxıstana əsas idxal malları - etilen polimerləri (1,3 milyon dollar) və digərləridir.

Bu gün Qazaxıstanda Azərbaycan kapitalı ilə təxminən 1 500 şirkət, Azərbaycanda isə Qazaxıstan kapitalı ilə təxminən 1 50 şirkət qeydiyyatdadır.

Qazaxıstan Milli Bankının məlumatına görə, 2005-2024-cü illər ərzində Azərbaycandan cəlb edilən investisiyaların həcmi 420,8 milyon dollar olub. Azərbaycan iqtisadiyyatına cəlb edilən investisiyaların həcmi isə 156,1 milyon dollar təşkil edib.