Gürcüstanda vaksinasiyada passivlik müşahidə edilir

“Bu günə olan məlumata əsasən, Gürcüstanda 20 622 nəfər koronavirus əleyhinə peyvənd olunub”.

“Report”un yerli bürosu xəbər verir ki, bunu ölkənin Xəstəliklərə Nəzarət və İctimai Sağlamlıq Milli Mərkəzinin rəhbəri, baş epidemioloq Amiran Qamkrelidze deyib.

Onun sözlərinə görə, ötən gün 928 nəfər vaksinasiyadan keçib, son həftə ərzində isə orta göstərici 1 200 nəfər təşkil edib: “Peyvənd olunan şəxslərin sayı tələb olunandan azdır. Hazırkı mərhələdə gündəlik olaraq 3 mindən 4 minədək şəxs vaksinasiydan keçməlidir ki, gələn ilin mart-aprel aylarında kollektiv immunitet formalaşa bilsin”.

Qeyd edək ki, qonşu ölkədə vaksinasiyaya martın 15-dən start verilib. Prosesdə “AstraZeneca” və “Pfizer” preparatlarından istifadə olunur.