Gürcüstanın bir neçə bölgəsində meşə yanğını ocaqları yaranıb - YENİLƏNİB

Hazırda Gürcüstanın bir neçə bölgəsində meşə yanğını ocaqları qeydə alınıb.

"Report"un Gürcüstan bürosu xəbər verir ki, bu barədə Ətraf Mühitin Mühafizəsi və Kənd Təsərrüfatı Nazirliyinin Milli Meşə Təsərrüfatı Agentliyi son günlər ökədə artan meşə yanğınları ilə bağlı bəyanatında qeyd olunub.

Agentlik vətəndaşları meşə ərazilərində xüsusilə diqqətli olmağa çağırıb.

"Ölkədə meşə yanğını ocaqları qeydə alınan bölgələrə Kvemo Kartli, Mtsxeta-Mtianeti, Raça-Leçxumi-Kvemo Svaneti, İmereti və Samtsxe-Cavaxeti daxildir. Yanğınlar əsasən meşənin aşağı təbəqəsində müşahidə olunur", - bəyanatda bildirilib.

Məlumata əsasən, meşə yanğınlarının qarşısının alınması və söndürülməsi məqsədilə Fövqəladə Halların İdarə Olunması Xidməti, Milli Meşə Təsərrüfatı Agentliyi və Ətraf Mühitə Nəzarət Departamenti birgə iş aparır.

Həmçinin, bildirilib ki, meşəyə qəsdən və ya ehtiyatsızlıqdan vurulan ziyana görə məsuliyyət mövcuddur və İnzibati Xətalar Məcəlləsinə əsasən, faktla bağlı tədbirlər görüləcək. Nazirlik qeyd edir ki, ölkə üzrə 24 saatlıq patrul xidməti fəaliyyət göstərir.

12:04

Gürcüstanın Bağdati rayonunda səhər saatlarından etibarən meşə yanğını başlayıb.

"Report"un Gürcüstan bürosu xəbər verir ki, Fövqəladə İdarəetmə Xidməti Bağdatinin Xani kəndi yaxınlığında qarışıq meşə massivində başlayan yanğının hələ də davam etdiyini bildirib.

Qurumun məlumatına görə, alovun söndürülməsinə 200-ə yaxın yanğınsöndürən və müxtəlif növ xüsusi texnika cəlb olunub. Ərazidə hazırda intensiv yanğınsöndürmə işləri aparılır.

Məlumata əsasən, əməliyyata Sərhəd Polisinin üç helikopteri də qoşulub. Hadisə yerində vəziyyətə operativ nəzarət üçün təcili qərargah yaradılıb.

Rəsmi açıqlamada qeyd olunur ki, yanğının yaşayış məntəqələrinə keçməsi ilə bağlı hər hansı təhlükə yoxdur.