Ermənistanda ABŞ ilə imzalanan anlaşma memorandumları dərc edilib

Ermənistan Baş nazirinin aparatı avqustun 8-də İrəvan və Vaşinqton arasında imzalanmış üç anlaşma memorandumunu dərc edib.

"Report" xəbər verir ki, bu barədə Ermənistan KİV-i məlumat yayıb.

İmzalanan sənədlərdən biri süni intellekt və yarımkeçiricilər sahəsində innovasiyalar üzrə tərəfdaşlıq haqqında Anlaşma Memorandumudur:

Sənəddə tərəflər yarımkeçiricilərin təchizat zənciri və süni intellektin inkişafı sahəsində öz prioritetləri kontekstində cavab verməyə yönəliblər. O cümlədən, Ermənistanın yarımkeçiricilər ekosisteminin daha da inkişaf etdirilməsi ilə bağlı imkanların öyrənilməsi; təhlükəsiz yarımkeçirici təchizat zəncirləri və süni intellektin tətbiqi sahəsində qabaqcıl təcrübə haqqında qarşılıqlı məlumat mübadiləsinin genişləndirilməsi bura daxildir.

İkinci sənəd - "Sülh kəsişməsi" layihəsinin potensialının artırılması üzrə tərəfdaşlıq haqqında Anlaşma Memorandumu - ABŞ hökumətinin resurslarından və ABŞ Daxili Təhlükəsizlik Nazirliyinin Gömrük və Sərhəd Xidmətinin qabaqcıl təcrübəsindən istifadə etməklə təlim vasitəsilə Ermənistanın sərhəd təhlükəsizliyinin gücləndirilməsini; kibermüdafiə əməliyyatlarına investisiyaların artırılmasını; Ermənistanın infrastrukturunun, eləcə də sərhəd təhlükəsizliyi sektorunun modernləşdirilməsinə investisiyaların stimullaşdırılmasını nəzərdə tutur.

Sonuncu sənəd ABŞ hökuməti ilə Ermənistan arasında enerji təhlükəsizliyi sahəsində tərəfdaşlıq haqqında Anlaşma Memorandumu olub. Bu sənədlə tərəflər mülki nüvə enerjisi sahəsində əməkdaşlığın gücləndirilməsinə dair ümumi səylərini təsdiqləyirlər.

Sənədə əsasən, iştirakçılar Ermənistanın enerji sektorunun prioritetləri kontekstində reaksiya verməyi hədəfləyirlər, o cümlədən: özəl sektorun investisiyalarının stimullaşdırılması; mülki nüvə enerjisi sahəsində əməkdaşlığın genişləndirilməsi; kritik enerji obyektlərinin mühafizəsinin gücləndirilməsi; kritik və sosial infrastrukturun enerji dayanıqlılığının artırılması; regional enerji əməkdaşlığının və enerji resurslarının transsərhəd ticarəti imkanlarının inkişafı; Ermənistanın enerji sektoru işçilərinin bacarıqlarının inkişafı və potensialının artırılmasının dəstəklənməsi buraya daxildir.

Hər üç memorandum imzalandığı tarixdən qüvvəyə minir və bir il müddətində qüvvədə qalır.