Armen Qriqoryan və Əli Laricani Vaşinqton sammitinin nəticələrini müzakirə ediblər - YENİLƏNİB

Ermənistanın Təhlükəsizlik Şurasının katibi Armen Qriqoryan İranın Ali Milli Təhlükəsizlik Şurasının katibi Əli Laricaniyə avqustun 8-də Vaşinqtonda ABŞ, Azərbaycan və Ermənistan liderlərinin iştirakı ilə imzalanmış sənədlər barədə məlumat verib. 

"Report" xəbər verir ki, bu barədə Ermənistan KİV-i məlumat yayıb.

A.Qriqoryan, xüsusilə, regionda iqtisadi infrastrukturun açılmasının hansı prinsiplə həyata keçiriləcəyini izah edib.

Ə.Laricani, öz növbəsində, Ermənistan və Azərbaycan arasında sülhün qurulmasına yönəlmiş razılaşmaları alqışlayıb, Cənubi Qafqazda sabitliyin və təhlükəsizliyin təmin edilməsinin vacibliyini vurğulayıb.

Qeyd edək ki, Vaşinqton sammitində Azərbaycan və Ermənistan liderlərinin Birgə Bəyannaməsi imzalanıb, iki ölkənin XİN başçıları həmçinin "Sülh və dövlətlərarası münasibətlərin qurulması haqqında Saziş"i paraflayıblar, həmçinin Minsk qrupunun və onunla əlaqəli təsisatların ləğvi ilə bağlı ATƏT-ə müraciət imzalayıblar.

10:31

İranın Ali Milli Təhlükəsizlik Şurasının katibi Əli Laricani və Ermənistanın Təhlükəsizlik Şurasının katibi Armen Qriqoryan Tehranda görüş keçiriblər.

"Report"un "Tasnim"ə istinadən verdiyi məlumata görə, tərəflər ikitərəfli münasibətləri və regional prosesləri müzakirə ediblər.

Görüşün digər təfərrüatları açıqlanmayıb.