Somali səfiri WUF13-də əlçatan mənzil sahəsində üç əsas problemi açıqlayıb

Əlçatan mənzil sahəsində edən üç əsas problem təxirəsalınmaz həll tələb edir.

"Report" xəbər verir ki, bu barədə Somalinin Keniyadakı səfiri Cabril İbrahim Abdulle Bakıda Ümumdünya Şəhərsalma Forumunun 13-cü sessiyası (WUF13) çərçivəsində "Dayanıqlı mənzil və sabit şəhərlər üçün ən yaxşı həll yollarının axtarışında: Şəhərlərin səsləri" adlı panel müzakirəsində bildirib.

"İnkişaf etmiş infrastruktur, iqtisadi əlçatanlıq və məcburi köçkünlərə xüsusi yanaşma olmadan mənzil sahəsindəki proqramların nəticəsiz qalmaq riski var", - diplomat qeyd edib.

O vurğulayıb ki, ətrafında müvafiq infrastruktur olmadıqda yalnız yaşayış obyektlərinin inşası problemi həll etmək iqtidarında deyil. "Əgər evlər şəhər hüdudlarından 20 kilometr aralıda tikilirsə və sakinlər işlə təmin olunmaq imkanından məhrumdurlarsa, belə mənzillər tələbatsız qala bilər", - o bildirib.

İkinci mühüm problem kimi səfir mənzilin iqtisadi cəhətdən əlçatmazlığını xüsusi qeyd edib.

O qeyd edib ki, hətta dövlət dəstəyi mövcud olduqda belə, ipoteka kreditləri üzrə şişirdilmiş faiz dərəcələri, xüsusən də Qlobal Cənub ölkələrində şəxsi mənzil almağı əhalinin mütləq əksəriyyəti üçün reallaşdırılması mümkünsüz bir məsələyə çevirir. C. Abdulle ciddi diqqət tələb edən üçüncü aspekt kimi məcburi köçkünlərlə bağlı vəziyyəti adlandırıb. Uzun illər boyu ağır şəraitdə yaşayan və travmatik təcrübə keçirmiş insanlar, onlara daimi yaşayış yerlərində mənzil məsələsinin uzunmüddətli və dayanıqlı həllinə zəmanət verə biləcək fərdi yanaşma tələb edirlər, - diplomat deyib.