Kamran Ağayev 2 ildən sonra rəsmi oyuna çıxır

Azərbaycan millisinin sabiq oyunçusu Kamran Ağayev uzun fasilədən sonra rəsmi matça çıxacaq.

"Report"un məlumatına görə, hazırda "Səbail"in formasını geyinən 35 yaşlı qapıçı bu gün ölkə kubokunun 1/4 final mərhələsinin ilk görüşündə "Sumqayıt"a qarşı oynayacaq.

Komandanın baş məşqçisi Aftandil Hacıyev təcrübəli qolkiperə start heyətində yer verəcək. "Kapital Bank Arena"dakı qarşılaşma saat 16:00-da start başlayacaq.

Qeyd edək ki, Kamran Ağayev "Səbail"ə 2020-ci ilin avqustunda keçib. Onun klubla sözləşməsi mövsümün sonunda başa çatacaq. Ağayev son rəsmi oyununu 2019-cu ilin martında "Keşlə"nin heyətində "Neftçi"yə qarşı keçirib. O, görüşün 30-cu dəqiqəsində zədələnərək meydanı tərk edib və uzun müddət futbolsuz qalıb.