III MDB Oyunları: Azərbaycanlı avarçəkən ikinci medalını qazanıb - YENİLƏNİB-3

III MDB Oyunları çərçivəsində keçirilən avarçəkmə yarışlarının birinci günündə Amil Ramazanov ikinci medalını qazanıb.

"Report"un Qərb bürosunun məlumatına görə, günün birinci yarısında birnəfərlik kayak qayığında 500 metr məsafəyə 2007-2008-ci il təvəllüdlü idmançılar arasında bürünc medala sahib olan Ramazanov 200 metrdə də eyni nəticəni təkrarlayıb.

15:59

III MDB Oyunları çərçivəsində keçirilən avarçəkmə yarışlarında Azərbaycan komandası üçüncü medalı qazanıb.

"Report"un Qərb bürosunun məlumatına görə, Əlimurad Hacızadə 2009-2010-cu il təvəllüdlü idmançılar arasında 1 nəfərlik kayak qayığında 200 metr məsadə gümüş medala sahib olub.

Qeyd edək ki, daha əvvəl Amil Ramazanov kayak qayığında 500 metr, İvan Vorobyanski-Hüseyn Həsənov dueti isə 200 metr məsafədə bürünc medal əldə edib.

11:41

III MDB Oyunları çərçivəsində keçirilən avarçəkmə yarışlarında Azərbaycan komandası ikinci medalı qazanıb.

"Report"un Qərb bürosunun məlumatına görə, ikinəfərlik kayak qayığında 200 metr məsafəyə 2009-2010-cu il təvəllüdlü idmançılar arasında İvan Vorobyanski-Hüseyn Həsənov dueti final yürüşündə finiş xəttini üçüncü yerdə keçib.

Qeyd edək ki, daha əvvəl Amil Ramazanov kayak qayığında 500 metr məsafə üzrə bürünc medal əldə edib.

11:26

Azərbaycan avarçəkənləri III MDB Oyunlarına medalla başlayıb.

"Report"un Qərb bürosunun məlumatına görə, Amil Ramazanov kayak qayığında 500 metr məsafə üzrə bürünc medal qazanıb.

Qeyd edək ki, avarçəkmə yarışlarına oktyabrın 6-da yekun vurulacaq.