SOCAR Türkiyədə neft koksu istehsalını cüzi azaldıb

Bu ilin yanvar-iyun aylarında Azərbaycan Dövlət Neft Şirkətinin (SOCAR) Türkiyədəki aktivi olan STAR Neft Emalı Zavodu (NEZ) 388 min 354 tona yaxın neft koksu istehsal edib.

Bu barədə "Report" Türkiyənin Enerji Bazarının Tənzimlənməsi Qurumuna (EPDK) istinadən xəbər verir.

Bu, 2024-cü ilin eyni dövrü ilə müqayisədə 35 ton və ya 0,01 % azdır.

İyun ayında isə STAR NEZ 58 min 583 tondan çox neft koksu istehsal edib ki, bu da bir il öncəki göstərici ilə müqayisədə 8 103 ton və ya 12,1 % azdır.

Ümumilikdə, bu ilin yanvar-iyun aylarında Türkiyədə neft emalı zavodları tərəfindən 842 min 501 tona yaxın, iyunda 129 min 717 tondan çox neft koksu istehsal edilib. Bu, 2024-cü ilin eyni dövrü ilə müqayisədə müvafiq olaraq 254 min 215 ton (43,2 %) və 9 min 438 ton (7,8 %) çoxdur.

Qeyd edək ki, STAR-ın açılışı 19 oktyabr 2018-ci ildə olub. 2019-cu ilin sentyabr ayından etibarən zavod tam gücü ilə işləməyə başlayıb. Zavod ildə 13 milyon ton xam neft emal gücünə malikdir. Müəssisədə "Urals", "Azeri Light" və "Kərkük" neft növlərini emal etmək mümkündür. Əsas məhsullarını dizel yanacağı (4,8 milyon ton), təyyarə yanacağı, nafta (1,6 milyon ton), maye neft qazı, qarışıq ksilol, neft koksu təşkil edir.

STAR Türkiyənin ilk Strateji Sərmayə Təşviq Sənədinə sahib olub.