İyunda Azərbaycan Türkiyəyə qaz nəqlini 40 % artırıb

Bu ilin iyun ayında Azərbaycan Türkiyəyə 729,44 milyon kubmetr təbii qaz ixrac edib.

“Report” xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, ötən ilin iyun ayı ilə müqayisədə 39,59 % çoxdur.

Bununla da iyun ayında Azərbaycan Türkiyəyə təbii qaz ixrac edən üçüncü ölkə olub. Türkiyənin ümumilkdə idxal etdiyi təbii qazın 19,02 %- Azərbaycanın payına düşüb.

2022-ci ilin yanvar-iyun aylarında isə Türkiyə Azərbaycandan 4 milyard 450,41 milyon kubmetr təbii qaz idxal edib ki, bu da 2021-ci ilin ilk yarım ilinin göstəriciləri ilə müqayisədə 8,8 % azdır.

Ümumilikdə isə bu ilin iyun ayında Türkiyə ümumilikdə 3 milyard 836,03 milyon kubmetr həcmində təbii qaz idxal edib ki, bu da 2021-ci ilin eyni ayının göstəriciləri ilə müqayisədə 5,64 % azdır.

İyunda Rusiya Türkiyəyə qaz ixracına görə lider olub. Həmin ay Rusiyadan Türkiyəyə 1 milyard 689,7 milyon kubmetr təbii qaz ixrac olunub. Bu, 2021-ci ilin iyun ayı ilə müqayisədə 29,52 % azdır.

İyunda ikinci yerdə İran qərarlaşıb. Bu ölkə iyunda Türkiyəyə 855,05 milyon kubmetr qaz nəql edib. Bu, 2021-ci ilin iyun ayı ilə müqayisədə 1,38 % azdır.

Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.