Azərbaycan Türkiyəyə qaz nəqlini 4 % azaldıb

Bu ilin oktyabr ayında Azərbaycan Türkiyəyə 760,97 milyon kubmetr təbii qaz ixrac edib.

“Report” xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, ötən ilin oktyabr ayı ilə müqayisədə 0,13 % azdır.

Bununla da oktyabr ayında Azərbaycan Türkiyəyə təbii qaz ixrac edən ikinci ölkə olub. Türkiyənin ümumilkdə idxal etdiyi təbii qazın 23,5 %-i Azərbaycanın payına düşüb.

Bu ilin yanvar-oktyabr aylarında isə Türkiyə Azərbaycandan 7 milyard 170,62 milyon kubmetr təbii qaz idxal edib ki, bu da 2021-ci ilin 10 ayının göstəriciləri ilə müqayisədə 3,9 % azdır.

Ümumilikdə isə bu ilin oktyabr ayında Türkiyə ümumilikdə 3 milyard 238,19 milyon kubmetr həcmində təbii qaz idxal edib ki, bu da 2021-ci ilin eyni ayının göstəriciləri ilə müqayisədə 30,47 % azdır.

Rusiya Türkiyəyə qaz ixracına görə lider olub. Həmin ay Rusiyadan Türkiyəyə 948,83 milyon kubmetr təbii qaz ixrac olunub. Bu, 2021-ci ilin oktyabr ayı ilə müqayisədə 49,14 % azdır.

Üçüncü yerdə İran qərarlaşıb. Bu ölkə oktyabrda Türkiyəyə 671,3 milyon kubmetr qaz nəql edib. Bu, 2021-ci ilin oktyabr ayı ilə müqayisədə 69,9 % çoxdur.

Qeyd edək ki, Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.