Zelenski nazirlərin "çağırışlara uyğunluğu"nu yoxlamağı tapşırıb

Ukrayna Prezidenti Volodimir Zelenski hazırkı nazirlərin "çağırışlara uyğunluğu"nu qiymətləndirməyi tapşırıb.

"Report"un məlumatına görə, Zelenski bu barədə "Telegram" kanalındakı axşam müraciətində danışıb.

"Hazırkı nazirlər elə qiymətləndirilməlidir ki, tam aydın nəticə çıxarılsın – mövcud məmurlar həm bu qışın, həm də bu müharibənin çağırışlarına cavab verirlərmi", – deyə Ukrayna lideri bildirib.

Bundan əlavə, o, energetika və ədliyyə naziri vəzifələrinə namizədləri, həmçinin 2026-cı il dövlət büdcəsinin qəbulunu gözlədiyini vurğulayıb.

Daha əvvəl Zelenski Ukrayna Prezident Administrasiyasının rəhbəri Andrey Yermakın istefasını qəbul edib. Bununla yanaşı, Ukrayna Prezidenti öz administrasiyasının tam yenilənəcəyini elan edib. O, noyabrın 29-da PA-ya rəhbərlik edə biləcək şəxslərlə məsləhətləşmələr aparacağını bildirib.