Rusiyanın Odessaya hücumu nəticəsində altı nəfər xəsarət alıb - YENİLƏNİB

Rusiya Silahlı Qüvvələrinin pilotsuz uçuş aparatları ilə Ukrayanın Odessa şəhərinə kütləvi hücumu nəticəsində xəsarət alanların sayı altı nəfərə çatıb.

"Report" Ukrayna mətbuatına istinadən xəbər verir ki, bu barədə Odessa şəhər Hərbi Administrasiyasının rəhbəri Sergey Lısak məlumat verib.

"Bu dəqiqəyə olan məlumata görə, gecə həyata keçirilmiş hücum nəticəsində artıq altı nəfər xəsarət alıb", - o qeyd edib. Odessa Vilayət Hərbi Administrasiyasının rəhbəri Oleq Kiper xəsarət alanların hamısının iki ailənin üzvləri olduğunu bildirib. Onlardan 3-ü 7 ay-14 yaşadək olan uşaqlardır.

"Üçü uşaq olmaqla beş nəfər xəstəxanaya yerləşdirilib. Yaralılardan birinin vəziyyəti ağır, digərlərinin vəziyyəti orta ağırdır", - o deyib.

Bundan başqa, iki enerji obyekti də hücuma məruz qalıb.

08:36

Rusiya qoşunlarının gecə hücumu nəticəsində Ukraynanın Odessa şəhərində azı dörd nəfər xəsarət alıb. Zərbələrdən sonra evlər və avtomobillər yanıb.

"Report"un məlumatına görə, bu barədə "RBK-Ukraina" yerli rəsmilərə istinadən xəbər yayıb.

Şəhərin hərbi administrasiyasının rəhbəri Sergey Lısak iki rayonda çoxmərtəbəli binaların vurulduğunu və bir binada mənzil yanğınının baş verdiyini, nəticədə üçü uşaq da daxil olmaqla dörd nəfərin xəsarət aldığını qeyd edib.

"Zərərçəkənlərin hamısı tibb müəssisələrinə aparılıb və bütün zəruri yardımlar göstərilir", - o, teleqram kanalında yazıb.

Regional hərbi administrasiyanın rəhbəri Oleq Kiper fövqəladə xidmətlərin hadisə yerində işlədiyini bildirib.

"Zərər çəkmiş binaların sakinlərinə yardım göstərilir", - regional hərbi administrasiyanın rəhbəri əlavə edib.