Rubio: Yaxın saatlarda İranla razılaşmada irəliləyiş əldə oluna bilər

ABŞ yaxın saatlarda İranla razılaşmada irəliləyişə ümid edir.

"Report" xəbər verir ki, bu barədə ABŞ dövlət katibi Marko Rubio Ağ Evdə iclas zamanı məlumat verib.

"Biz onun (sazişin - red.) bağlanmasını istəyirik. Hesab edirəm ki, müəyyən irəliləyiş və maraq var, və biz yaxın bir neçə saat və gün ərzində irəliləyişə nail olmağın mümkün olub-olmadığına baxacağıq", - o deyib.

Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. Həmin gün zərbələr nəticəsində İranın Ali rəhbəri Əli Xamenei öldürülüb. İran buna cavab olaraq İsrail ərazisinə və Fars körfəzi ölkələrindəki ABŞ hərbi bazalarına hücum edib.

İran, ABŞ və onların müttəfiqləri aprelin 8-ə keçən gecə atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.

Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.

ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının bağlandığını elan edib. Regionda dinamik şəkildə dəyişən vəziyyət qlobal enerji böhranına səbəb olub.