Pakistanda daşqınlar nəticəsində ölənlərin sayı 100-ü keçib

Pakistanın Pəncab əyalətində daşqınlar nəticəsində ölənlərin sayı 100-ü keçib.

"Report" "TRT World"ə istinadən xəbər verir ki, bu barədə əyalətin Fəlakətlərin İdarə Edilməsi İdarəsinin nümayəndəsi bildirib.

Yardım komissarı Nabil Caved deyib ki, Pəncab tarixinin ən dəhşətli fəlakəti kimi təsvir edilən daşqınlar 4 700-dən çox kəndi su altında qoyub və 4,57 milyon insana təsir edib.

Caved 2,51 milyon insanın təhlükəsiz ərazilərə təxliyə edildiyini söyləyib.

Xilasetmə və bərpa əməliyyatları davam edir. 

BMT-nin məlumatına görə, iyunun 26-dan bəri güclü musson yağışları və daşqınlar Pakistanda 932 nəfərin həyatına son qoyub, 8 238 evi dağıdıb.