ABŞ İrandakı hədəflərə növbəti zərbələr seriyasını başa çatdırıb - YENİLƏNİB

ABŞ Silahlı Qüvvələrinin Mərkəzi Komandanlığı (CENTCOM) Ali Baş Komandanın göstərişi ilə İrana endirilən növbəti zərbələr seriyasının başa çatdığını bildirib.

"Report" xəbər verir ki, ardıcıl səkkizinci gecə endirilən zərbələr zamanı Amerika qüvvələri sahil müşahidə və hava hücumundan müdafiə obyektlərini, dəniz infrastrukturunu, eləcə də raket və pilotsuz uçuş aparatlarının saxlanma yerlərini vurub.

Komandanlığın bildirdiyinə görə, zərbələr İranın hərbi potensialının daha da zəiflədilməsinə yönəlib.

Bundan başqa, iyulun 17-də İordaniyada amerikalı hərbi qulluqçulara edilən hücumlarda əli olan İslam İnqilabı Keşikçiləri Korpusunun (SEPAH) qüvvələrinə zərbələr endirilib.

04:07

ABŞ Silahlı Qüvvələri bazar gününə keçən gecə İran ərazisindəki hədəflərə qarşı yeni zərbələr seriyasına başlayıb.

"Report" xəbər verir ki, bu barədə ABŞ Silahlı Qüvvələrinin Mərkəzi Komandanlığı (CENTCOM) "X" sosial şəbəkəsində məlumat yayıb.

"Bu gün ABŞ-nin şərq sahili vaxtı ilə saat 18:00-da (Bakı vaxtı ilə 19 iyul 02:00-da - red.) ABŞ Silahlı Qüvvələri yenidən İrana aviazərbələr endirməyə başlayıb", - bəyanatda deyilir.

Zərbələrin bəyan edilən məqsədi İranın Hörmüz boğazında kommersiya gəmiçiliyinə təhdid yaratmaq qabiliyyətini daha da azaltmaq və ötən gecə İordaniyada amerikalı hərbçilərə hücum edən İslam İnqilabı Keşikçiləri Korpusunun (SEPAH) qüvvələrini "cəzalandırmaq"dır.

Daha əvvəl CENTCOM İordaniyada İranın zərbələri nəticəsində iki amerikalı hərbçinin həlak olduğunu, daha birinin isə itkin düşdüyünü bildirmişdi.