Fuad Muradov: Düşərgənin iştirakçısı olan gənclər diaspor quruculuğunda fəallıq nümayiş etdirəcəklər

Düşərgənin iştirakçısı olan gənclər diaspor quruculuğunda fəallıq nümayiş etdirəcəklər.

"Report"un Xankəndiyə ezam olunmuş əməkdaşı xəbər verir ki, bunu "Konstitusiya və Suverenlik İli"nə həsr olunmuş Diaspor Gənclərinin VI Yay Düşərgəsi çərçivəsində jurnalistlərə açıqlamasında Diasporla iş üzrə Dövlət Komitəsinin sədri Fuad Muradov deyib.

Onun sözlərinə görə, düşərgə iştirakçıları öz ölkələrinə qayıtdıqda Azərbaycanda gedən proseslər barəsində geniş məlumat verəcəklər:

"Yay Düşərgəsi ənənəvi olaraq Diasporla iş üzrə Dövlət Komitəsi və Heydər Əliyev Fondunun təşkilatçılığı ilə keçirilir. Xankəndidə baş tutan VI Yay Düşərgəsində iştirak edən 61 ölkədən 128 Azərbaycan gənci bir həftə ərzində Azərbaycan haqqında qiymətli məlumat əldə edəcək, eyni zamanda bizim ziyalılarla, şəhid ailələri, idmançılar, bir sözlə, bütün istiqamətlər üzrə uğur qazanan insanlarla görüşəcəklər.

Bu gün Xankəndidə olduğumuz üçün xoşbəxtik. Bundan əvvəlki yay düşərgələri həmçinin Laçın və Şuşada baş tutub. Ümid edirik ki, burada iştirak edən gənclərimiz diaspor quruculuğu işində çox fəal iştirak edəcəklər. Onlar öz ölkələrinə qayıtdıqda Azərbaycanda gedən proseslər barəsində geniş məlumat verəcək, həmçinin Azərbaycana qarşı çıxan qüvvələrə qarşı qəti mövqe bidirəcəklər”.