Salyanda qədim saxsı qab parçaları aşkar edilib

Salyan rayonunda qədim dövrə aid ola biləcəyi ehtimal olunan saxsı qab parçaları tapılıb.

"Report"un Aran bürosunun məlumatına görə, hadisə rayonun Sarvan kəndi ərazisində qeydə alınıb.

Belə ki, kənd sakini Şahin Məhərrəmov əkin sahəsində şum işləri apararkən üzərində müxtəlif naxış və ornamentlər olan bir neçə sirli saxsı qab parçası aşkar edib.

Tapılan parçaların yaşıl rənglə örtüldüyü və üzərinin incə naxışlarla bəzədildiyi bildirilib.

İlkin müşahidələrə əsasən, bu tapıntıların qədim yaşayış məskəninə və ya məişət mədəniyyətinə aid olması ehtimal edilir.

Hələlik saxsı parçalarının hansı tarixi dövrə məxsus olduğu məlum deyil.