Bu il Azərbaycan Yaponiyada Ticarət  Evi açacaq

Azərbaycanın növbəti Ticarət Evi bu il Yaponiyanın paytaxtı Tokioda açılması planlaşdırılır.

Bunu “Report”a İqtisadiyyat Nazirliyi yanında Azərbaycanda İxracın və İnvestisiyaların Təşviqi Fondunun (AZPROMO) rəhbəri Yusif Abdullayev deyib.

Onun sözlərinə görə, bu ölkədə Ticarət Evinin açılması faydalı layihə olacaq: “Hazırda Yaponiyaya ixrac ediləcək qeyri-neft məhsullarının siyahısı hazırlanır. Ticarət Evinin açılmasında əsas məsələ ticarətin balansına təsir edə bilən komponenti ortaya qoymaqdır”.

Y. Abdullayev Azərbaycanın xaricdə açdığı ticarət evlərinin ixraca təsiri ilə bağlı məsələyə toxunub: “Məsələn, bizim Çində ticarət evlərimiz, ticarət nümayəndəliklərimiz var. Bu, Azərbaycan və Çin arasında qeyri-neft ticarətinə bilavəsitə təsir göstərir. Bizim xaricdə fəaliyyət göstərən ticarət nümayəndələrimizin qarşısında konkret hədəf qoyulub. Onlar da həmin hədəfləri həyata keçirirlər. Həm ticarət evləri, həm də ticarət nümayəndəlikləri çox faydalı, praktik bir fəaliyyət göstərirlər”.

Xatırladaq ki, Azərbaycanın xaricdə fəaliyyət göstərən ticarət evlərinin sayı 15-dən çoxdur.