Azərbaycan və Qazaxıstan sahibkarları arasında şəbəkələşmə planlaşdırılır

İqtisadiyyat Nazirliyi yanında Sahibkarlığın İnkişafı Fondu (SİF) və Qazaxıstana məxsus "Sahibkarlığın İnkişafı Fondu" ASC-nin (DAMU) koordinatorluğu ilə iki ölkənin KOB subyektləri üçün “B2B” görüşləri keçiriləcək.

Bu barədə “Report”a açıqlamasında SİF-in Strateji təhlil və beynəlxalq əlaqələr şöbəsinin aparıcı mütəxəssisi Fateh İsrəfilzadə deyib.

F.İsrəfilzadə bildirib ki, bu cür konfransların yaxın illərdə təşkili nəzərdə tutulub:

“Sahibkarlıq subyektləri arasında şəbəkələşməni təmin etmək və biznes əlaqələrinin qurulmasına töhfə vermək DAMU ilə imzalanmış sənəd üzrə görüləcək tədbirlərdən biridir. Eyni zamanda DAMU ilə imzalanmış "Yol xəritəsi"ndə KOB subyektləri üçün yeni maliyyələşmə mexanizmlərinin, o cümlədən lizinq, faktorinq, dövriyyə kapitalı krediti, birbaşa maliyyələşmə və s. alətlərinin tətbiqi istiqamətində təcrübənin öyrənilməsi və yeni mexanizmlərin formalaşdırılması istiqamətində ekspert mübadiləsinin həyata keçirilməsi nəzərdə tutulub

Xatırladaq ki, bu ay SİF əməkdaşları Qazaxıstana işgüzar səfər edib. Səfər çərçivəsində Qazaxıstana məxsus DAMU-nun nümayəndələri ilə görüşlər keçirilib, tərəflərin birgə əməkdaşlığını ehtiva edən “Yol xəritəsi”nin icrası ilə bağlı görüləcək işlər barədə müzakirələr aparılıb.