Azərbaycan daha bir ölkəyə makaron tədarük etməyə başlayıb

Ötən il Azərbaycan 9,6 milyon ABŞ dolları dəyərində 14 min 572 ton makaron məmulatları (kuskusdan başqa) ixrac edib.

"Report"un Dövlət Statistika Komitəsinin məlumatları əsasında apardığı hesablamalarına əsasən, bu, 2024-cü ilin göstəricisindən dəyər ifadəsində 88 %, kəmiyyət olaraq – 73 % çoxdur.

Hesabat dövründə Azərbaycan İsrailə 7,1 milyon ABŞ dolları dəyərində (1 il əvvəlki göstəricidən 3 dəfə çox) 10 min 429 ton (+3 dəfə), Gürcüstana 1,9 milyon ABŞ dolları dəyərində (+12 %) 3 min 165 ton (+14 %), İraqa 197,5 min ABŞ dolları dəyərində (-71 %) 433 ton (-73 %), Amerika Birləşmiş Ştatlarına 105 min ABŞ dolları dəyərində 124 ton (5 il 10 aydan sonra tədarük bərpa edilib), Liviyaya 94 min ABŞ dolları dəyərində (+2,9 dəfə) 122 ton (+2,7 dəfə) məhsul satıb.

Ötən il son 14 ildə (qeyd: xarici ticarət üzrə açıq istifadədə olan rəsmi statistika 2011-ci ilə kimidir) ilk dəfə olaraq Keniyaya tədarük (45 min ABŞ dolları dəyərində 66,2 ton) həyata keçirilib.