Belarus ilk dəfə Azərbaycandan kartof idxal edib

Bu ilin yanvar-iyul aylarında Azərbaycan Belarusa kartof tədarük edən əsas ölkələr sırasına daxil olub.

"Report" bu barədə "EastFruit" analitik platformanın yaydığı məlumata istinadən xəbər verir.

Hesabat dövründə Belarusa ən çox kartof idxalı edən ölkə Ukrayna olub (15,5 min ton). Bu ilin ilk yeddi ayında Belarusun kartof idxal etdiyi əsas ölkələr sırasında Rusiya, Şimali Makedoniya, Misir və Almaniya da yer alıb.

Hazırda Belarusda kartof yığımları davam etsə də, Belarus ilk dəfə olaraq yerli məhsul yığımı zamanı kartof idxal edir. Bu ölkə kartof idxalatçısı kimi deyil, ixracatçısı kimi tanınır. Bu il Belarusun kartof idxal etməsinin səbəbi ölkədə bu məhsulun satış qiymətlərini yüksək olmasıdır. Belə ki, bu həftə Belarusda kartofun 1 kiloqramının topdan satış qiyməti 0,3 ABŞ dollarına çatıb və Rusiya istisna olmaqla regionun bütün ölkələrindən baha olub.

Hazırda Belarusda kartof digər vaxtlarda olduğundan 70 % baha qiymətə satılır. Bir qayda olaraq, sentyabrın ortalarında Belarusda 1 kq kartofun topdan satış qiyməti 0,15-0,19 ABŞ dolları olur. Kartof qiymətlərinin yüksək olmasının əsas səbəbi bu il istehsal həcmi ilə bağlı yaranan narahatlıqlardır. Belə ki, bu il hava şəraitinin əlverişli olmaması nəticəsində Belarusda kartof sahələrində quraqlıq yaşanıb. Bu da kartofun məhsuldarlığını və keyfiyyətini aşağı salıb.