Tramp Sorosa qarşı - ABŞ lideri məşhur filantropun həbsini istəyir - ŞƏRH

ABŞ Prezidenti Donald Tramp iş adamı Corc Sorosa qarşı cinayət işinin açılmasını tələb edib. Milyarder hökumətə qarşı etirazları dəstəkləməkdə ittiham edilir. Prezident hesab edir ki, Soros oğlu və dostları ilə birlikdə ABŞ-yə ciddi ziyan vurur. Prezident bununla yanaşı, 94 yaşlı milyarder və onun fondu barədə "psixopatlar qrupu", "sərsəmlər" kimi ifadələr səsləndirib. Əslində Tramp seçkiöncəsi təşviqat kampaniyasında da bu məsələyə toxunmuşdu və respublikaçıların hakimiyyətə qayıdışından sonra Sorosla haqq-hesab çürüdəcəyi gözlənilən idi. İllər ərzində həm ABŞ-də, həm də Qərbin müəyyən siyasi dairələrində Soros ailəsinin çirkin oyunlarına qarşı formalaşan narazılıq getdikcə daha da artmaqda davam edib.

Dünya siyasətində çirkin oyunları, bir sıra dövlətlərin hakimiyyətlərinə qarşı məkrli planları ilə tanınan Corc Soros xarici ölkələrin daxili siyasətlərinə qarışmaqda da ittiham edilir. Artıq bir sıra ölkələrdən qovulan və arzuolunmaz şəxs elan edilən Soros və fondu rəngli inqilablar da həyata keçirir. Məsələn, 2018-ci ildə məhz Sorosun dəstəyi ilə Nikol Paşinyan Serj Sarqsyanı devirərək, hakimiyyətə gəlib. ABŞ-də isə Trampın Sorosu cinayət məsuliyyətinə cəlb etməklə bağlı çıxışı əbəs deyil. Uzun müddətdir ki, Birləşmiş Ştatlarda respublikaçılarla Soros arasında ciddi mübarizə gedir. Hər zaman demokratları dəstəkləyən milyarder eyni zamanda Senatda büdcə ilə bağlı qanunun qəbuluna da təsir göstərmək istəyib. Bununla da "iş adamı" Donald Trampın siyasi kursuna mane olmaq niyyətini ortaya qoyur. Avropadan fərqli olaraq ABŞ-də Soros ideyanı deyil, komandanı dəstəkləyir. O, Demokrat Partiyasının ən böyük donorlarından biridir. 2004-cü il prezidentlik kampaniyası zamanı Soros respublikaçı Corc Buşun ikinci müddətə seçilməməsi üçün 27 milyon dollar xərcləyib. Lakin onun bütün səylərinə baxmayaraq, amerikalılar Buşu yenidən seçdilər.

Respublikaçı Donald Tramp da Sorosun "qara siyahısı"na düşüb. Burada 2018-ci ilin payızında mühafizəkar Brett Kavanonun Ali Məhkəmənin hakimi vəzifəsinə seçilməsi ilə bağlı qalmaqalı xatırlatmaq yerinə düşər. O dövrdə Tramp bəyan etdi ki, iş adamına məxsus fond Kavanoya qarşı etirazları maliyyələşdirir. Bu isə həqiqət idi. Çünki Kavanoya qarşı nümayişlər təşkil edən bir neçə qrup "Açıq Cəmiyyət" fondundan maliyyə alırdı. Soros, onun maliyyələşdirdiyi fəallar və təşkilatlar ABŞ siyasətində çirkin oyunlar qurur.

2017-ci ildə ABŞ konqresində respublikaçılar ortaq düşmən - milyarder maliyyəçi Corc Sorosun qarşısını almaq məqsədi ilə Şərqi Avropa ölkələrinin siyasətçiləri ilə birləşdilər. Konqresmen Kris Smit və senator Mayk Li dövlət katibi Reks Tillersona məktub göndərərək Soros və onun Açıq Cəmiyyət Fondlarının "proqressiv gündəmi inkişaf etdirmək və siyasi solu canlandırmaq" üçün maliyyə dəstəyi verdiyini bildiriblər. Qanunvericilər maliyyə mənbəyinin müstəqil dövlət qurumu olan USAID olduğunu deyirlər. Respublikaçılar həmçinin ABŞ-nin Makedoniyadakı səfirini "Makedoniya partiyasının siyasətinə fəal şəkildə müdaxilə etməkdə... başqalarından çox solçu siyasi qrupların xeyrinə" ittiham ediblər. Respublikaçılar Dövlət Departamentindən ABŞ-nin Balkanlardakı Soros təşkilatlarına xarici yardımının maliyyələşdirilməsi ilə bağlı hesabat təqdim etməyi xahiş edirlər. Məhz bu səbəbdən də yenidən hakimiyyətə qayıdan Donald Tramp cari ilin fevral ayında Federal Beynəlxalq İnkişaf Agentliyinin (USAID) fəaliyyətini saxtakarlıq və korrupsiya kimi qiymətləndirib. 1 iyul tarixindən isə USAİD fəaliyyətini dayandırıb. Bu, respublikaçılar-Soros savaşında mühüm məqamlardan biri idi. Amma tərəflər arasında savaş getdikcə daha da alovlanıb. Bədnam "xaos memarı" Corc Sorosun dəstəklədiyi bir neçə solçu təşkilat Tramp əleyhinə nümayişlərə 20 milyon dollardan çox ianə edib.

Pul prezidentin Vaşinqtonda cinayətlə mübarizə siyasətinə qarşı çıxmaq üçün liberal qruplara verilib. Trampın ilk prezidentliyi dövründə də Soros fondu etirazlara külli miqdarda pul xərcləyib. "Community Change" və "Community Change Action" təşkilatları Ağ Evin qarşısına 150 etirazçı toplayaraq, prezidentin qərarına qarşı etirazlar keçirib. Maraqlıdır ki, bu təşkilatlar da Sorosdan qidalanan qurumlardır. Təkcə 2023-cü ildə "Community Change" və "Community Change Action" "Açıq Cəmiyyət"dən 4 milyon dollar ianə alıb.

Bu səbəbdən də ABŞ Prezidenti fondun ölkə daxilindəki etirazlara maliyyə dəstəyi verməsinə etiraz edir. Qeyd etmək yerinə düşər ki, son illərdə Birləşmiş Ştatlarda gündəmi zəbt edən "Black Lives Matter" hərəkatı da daxil olmaqla bir çox aksiya və sosial dalğalanmalar məhz Soros və ona yaxın qurumların maliyyə dəstəyi ilə həyata keçirilib. Bu da təbii ki, hakim komandada ciddi narazılığın yaranmasına, fondun əsas məqsədinin respublikaçılara qarşı yönəlməklə yanaşı, Vaşinqtonun siyasi nizamını sarsıtmaq, ölkəni xaosa sürükləmək olduğunu ortaya çıxarmağa imkan yaradıb.

Qeyd etmək yerinə düşər ki, Tramp Sorosla yanaşı, onun oğlunu da hədəf alıb. Aleks Sorosun ölkə siyasətində təsiri getdikcə güclənir. Eyni zamanda onun demokratlara yaxınlığı da bir sıra mətləblərdən xəbər verir. Bu səbəbdən də Ağ Ev rəhbərinin yaxınlaşan təhlükəni əvvəlcədən duyması, onlara qarşı hərəkətə keçməsi anlaşılandır.

Azərbaycanda da "Soros" fondu 2011-ci ildə bağlanıb və buna səbəb kimi korrupsiya faktları göstərilib. Bununla yanaşı, qeyd edək yerinə düşər ki, fond ölkədə "inqilabçılar"ın yetişdirilməsi ilə məşğul olub. 2002-2014-cü illər arasında müxalifətyönümlü QHT-lərə 25 milyon dollardan çox pul ayrılıb. Paralel olaraq isə, fondun maliyyəsi ilə müxtəlif illərdə bir sıra Qərb media orqanlarında Azərbaycana qarşı çirkin kampaniya aparılıb. Maraqlıdır ki, 2017-ci ildə start verilən bu kampaniyalardan biri Azərbaycanda keçirilən prezident seçkiləri ilə bağlı olub. Əvvəlki illərdə çirkin niyyətinə nail ola bilməyən və biabırçı şəkildə ölkədən qovulan "Açıq Cəmiyyət" xaricdən də əməllərinə davam edib.

Yuxarıda sadalanan faktlardan məlum olur ki, bu gün xaos mühəndisi kimi tanınan Corc Soros və əlaltıları artıq bütün dayaqlarını itirmək üzrədir. Ehtimal etmək olar ki, Tramp bu dəfə milyarder və ona bağlı qurumlarla haqq-hesab çürüdəcək.

Kamil Məmmədov